കൊച്ചി: അറിവ് നേടുക എന്നത് ആകണം ജീവിത ത്തിന്റെ ലക്ഷ്യമെന്നും എല്ലായ്‌പ്പോഴും പുതിയ കാര്യങ്ങള്‍ പഠിക്കാന്‍ ശ്രമിക്കണമെന്നും ഗവര്‍ണര്‍ ആരിഫ് മുഹമ്മദ് ഖാന്‍ പറഞ്ഞു. ഹിന്ദുസ്ഥാന്‍ സ്‌കൗട്ട്‌സ് ആന്റ് ഗൈഡ്‌സ് അസോസിയേഷന്‍ മൂന്നാമത് രാജ്യപുരസ്‌കാര്‍ വിതരണം കാലടി ശ്രീ ശാരദാ വിദ്യാലയത്തില്‍ നടന്ന ചടങ്ങില്‍ നിര്‍വഹിക്കുകയായിരുന്നു അദ്ദേഹം. വിദ്യാഭ്യാസം ജീവിതത്തില്‍ മുഴുനീളമുള്ള ഒരു പ്രക്രിയയാണ്. അറിവും ജ്ഞാനവും മനുഷ്യന്റെ പൈതൃകമാണ്. സ്വയം ആനന്ദം കണ്ടെത്തുന്ന തിനൊപ്പം തന്നെ മറ്റുള്ളവരുടെ നേട്ടത്തിലും സന്തോഷത്തിലും ആനന്ദം കണ്ടെത്താന്‍ കഴിയണമെന്നും അദ്ദേഹം പറഞ്ഞു. അച്ചടക്കവും കഠിനാധ്വാനവും കൊണ്ട് വലിയ നേട്ടങ്ങള്‍ കൈവരിക്കാന്‍ വിദ്യാര്‍ത്ഥികള്‍ക്ക് സാധിക്കും. അറിവിന് നേരെയുള്ള വാതിലുകള്‍ എല്ലായ്‌പ്പോഴും തുറന്നിടണമെന്നും നേടിയെടുക്കുന്ന അറിവുകള്‍ മറ്റുള്ളവര്‍ക്കും സമൂഹത്തിന്റെ മഹത്വത്തിനും വേണ്ടി ഉപയോഗപ്പെടുത്തണമെന്നും അദ്ദേഹം പറഞ്ഞു.
ചടങ്ങില്‍ സംസ്ഥാനത്തെ വിവിധ സി.ബി.എസ്.ഇ വിദ്യാലയങ്ങളില്‍നിന്ന് തെരഞ്ഞെടുത്ത സ്‌കൗട്ട് ആന്റ് ഗൈഡ് ടീമിന് രാജപുരസ്‌കാര്‍ അവാര്‍ഡ് വിതരണം ചെയ്തു. ഹിന്ദുസ്ഥാന്‍ സ്‌കൗട്ട് ആന്റ് ഗൈഡ് കേരള വൈസ് പ്രസിഡന്റും ആദിശങ്കര ട്രസ്റ്റ് ചെയര്‍മാനുമായ കെ. ആനന്ദ്, ഹിന്ദുസ്ഥാന്‍ സ്‌കൗട്ട് ആന്റ് ഗൈഡ് സംസ്ഥാന സെക്രട്ടറി എം.ജൗഹര്‍, സംസ്ഥാന ചീഫ് കമ്മീഷണര്‍ എം. അബ്ദുള്‍ നാസര്‍, സംസ്ഥാന ട്രഷററും ശ്രീ ശാരദ വിദ്യാലയം പ്രിന്‍സിപ്പളുമായ ഡോ. ദീപ ചന്ദ്രന്‍ തുടങ്ങിയവര്‍ പങ്കെടുത്തു.
